اسمعني دقيقة

موضوع: اسمعني دقيقة 2010-02-08, 12:09

كم واحدٍ حطوه في قبره وباقي له حقوق
وكم واحدٍ راحت حقوق الناس في قبره معه

ياللي تبوق الناس وش رايك نسميك السروق
والا بعد ما ودّك ان الاسم هذا تسمعه

بكره ليا باح الكلام ويبست ارياق الحلوق
ووقف على بابك رسول الموت ما حد يمنعه

الناس من حولك وكل هابط له بطن سوق
واقربهم اللي قام يدعي لك ويمشي مدمعه

وجاك الملك من بينهم يسوق فيك الموت سوق
وانته تعاين فيه لكن ما انت قادر تدفعه

هم قام ينزع روحك اللي جوّدت معها العروق
وأنست حر الموت في قلبك قبل لا ينزعه

والتفت الساقين والتمّت عراجين العذوق
وجاء عند زورك من عظيم الكرب صوت وقربعه

وراح النظر يطرد ورا روحك ويلحقها لحوق
وقرت عيونك في السما والروح راحت مسرعه

واصبحت في قبرك قبل لا يبتدي وقت الشروق
من تحت سطح الارض في حفره قليلة لذرعه

يعني كذا خلاص ما تقدر تغش ولا تبوق
ولا يفيدك لا حلال ولا تفيدك مزرعه

راحت حقوق الناس في ذمتك طوق فوق طوق
يا كيف بعد الموت حق الناس تقدر ترجعه

المال يأخذه الولد وان كان في قلبه عقوق
ينشد عن أيام العزا ثلاثة والا اربعه

ما دامت القوة ولا عمّر على الأرض امخلوق
الادمي مهما يطول العمر يلقى مصرعه

هذا كلام العقل والمنطق وثقنا به وثوق
وان كان راسك ما اقتنع به حاول انك تقنعه

والا ترا الذمة برية منك واصبحت امحقوق
وان كان ودك بالسلامة فاسمع الشور وطعه

بعض العرب لا شفت جريه قلت عز الله سبوق
يطرد ورا الدنيا ولو حاش الذهب ما يشبعه

عينه على اللي عند خلق الله وفي قلبه حروق
لو كان يقدر كان حتى الما عليهم يقطعه

ما يدري انه لو قعد يجمع من المال ويحوق
ما يجمع الا اللي كتب ربي له انه يجمعه

الله قِسَم لارزاق يوم اعطى المزايا والفروق
وما فيه نفس الا لها رزق وفيها منفعه

والا من اللي علّم المولود لين اصبح يذوق
من علمه يلقى حليب امه ويقدر يرضعه

اللي يبي يرتاح في غير القناعة لا يتوق
يرضى بمقسومه ولا يتبع هواه ومطمعه

والرابح اللي راح في قبره وباقي له حقوق
ما راح في قبره وكل حقوق خلق الله معه

موضوع: رد: اسمعني دقيقة 2010-02-09, 14:12

يطرد ورا الدنيا ولو حاش الذهب ما يشبعه
فعلا هذه حالنا مع الدنيا كل الشكر تقبل مروري

موضوع: رد: اسمعني دقيقة 2010-02-10, 10:16

أشكرك على المرور الجميل

موضوع: رد: اسمعني دقيقة 2010-02-10, 22:46

هههههههههههه

شعر جميل و لطيف جدا

عبارات رائعة و معاني هادفة

جزاك الله خيرا

مشكووووووووووووووووووووووووور

....................................................................................................شريف

.