من اشعار ابن عدوان

موضوع: من اشعار ابن عدوان 2008-05-03, 20:57

البارحـه يــوم الخـلايـق نيـامـا
بيّحت من كثـر البكـى كـل مكنـون

قمت أتوجّـد وأنثـر المـا علـى مـا
من فوق عيني دمعهـا كـان مخـزون

ولـي ونـة ٍ مـن سمعَهـا مـا ينامـا
كني صويب ٍ بين الأضـلاع مطعـون

و إلا كمـا ونـة كسـيـر السْـلامـا
خلّـوه ربـعـه للمعـاديـن مـديـون

فـي ساعـة ٍ قـل الرجـا والمحامـا
فيمـا يطالـع يومهـم عنـه يقـفـون

و إلا فـونـة راعـبـيّ الحـمـامـا
غـاد ٍ ذكرهـا والقوانيـص يـرمـون

تسمـع لهـا بيـن الجرايـد حطـامـا
من نوحهـا تـدع ِ المواليـف يبكـون

و إلا خـلـوج ٍ سـابـة ٍ للهـيـامـا
على حوار ٍ ضايع ٍ في ضحى الكـون

و إلا حـوار ٍ مشْيِقـوا لـه شمـامـا
وهـي تطالـع يـوم جـرّوه بعـيـون

يـردون مثلـه والضوامـي صيـامـا
ترزّمـوا معهـا وقـامـوا يحـنّـون

و إلا رضيـع ٍ جـرّعـوه الفطـامـا
أمـه غـدت قبـل أربعينـه يتـمّـون

عليك ياللـي شربـت كـاس المحامـا
صـرف ٍ بتقديـر ٍ مـن الله مــاذون

جاه القضا مـن بعـد شهـر الصيامـا
صافي الجبيـن بثانـي العيـد مدفـون

كسوه من عرض الخرق ثـوب خامـا
و قاموا عليـه مـن الترايـب يهلّـون

راحـوا بهـا حـروة صـلاة اليِمامـا
عنـد الدفـن قامـوا لهـا الله يدعـون

برضـاه والجنـه وحسـن الختـامـا
ودمـوع عينـي فـوق خـدي يهلّـون

حطّـوه فـي قبـر ٍ عسـاه الهيـامـا
في مهمة ٍ من عـد الأمـوات مسكـون

يـا حفـرة ٍ يسقـي ثـراك الغمـامـا
مزن ٍ مـن الرحمـه عليهـا يصبّـون

جعـل البخَتـري والنفـل والخزامـى
ينبت علـى قبـر ٍ هـو فيـه مدفـون

مرحـوم ياللـي مـا مشـى بالملامـا
جيـران بيتـه راح مـا منـه يشكـون

وا وسع عـذري وان هجـرت المنامـا
ورافقت من عقب العقل كـل مجنـون

أخـذت انـا ويّـاه سبـعـة عـوامـا
مع مثلهن فـي كيفـة ٍ مـا لهـا لـون

والله كنهـا يـا عـرب صـرف عامـا
يا عونة الله صـرف الأيـام وشلـون؟

و أكبر همومـي مـن بـزور ٍ يتامـا
و إن شفتهـم قـدام وجهـي يبـكّـون

و ان قلـت لا تبكـون قالـوا علامـا؟
نبكـي ويبكـي مثلنـا كـل محـزون

قلـت السبـب تبكـون؟ قالـوا يتامـا
قلـت اليتيـم أيـاي وانتـم تسـجّـون

مـع البـزور وكـل جـرح ٍ يـلامـا
إلا جـروح بخاطـري مـا يطيـبـون

جرحي عميـق ٍ مثـل كسـر السلامـا
الى مكَـن.. عنـه الأطبّـا يعجـزون

قمـت اتشكّـى عنـد ربـع ٍ عـذامـا
جونـي علـى فرقـا خليلـي يعـزّون

قالـوا تجـوّز وانـس لامـه بـلامـا
بعض العذارى عـن بعضهـن يسلّـون

قلـت انهـا لـي وفّـقـت بالـولامـا
ولـو جمعتـوا نصفهـن مـا يسـدّون

مـا ظنّتـي تلقـون مثـلـه حـرامـا
أيضا ولا فيهـن علـى السـر مامـون

و أخـاف انـا مـن غاديـات الذمامـا
اللي على ضيـم الدهـر مـا يتاقـون

أو خبلـة ٍ مــا عقلـهـا بالتمـامـا
تضحك وهي تلدغ على الكبـد بالهـون

تـوذي عيالـي بالنـهـر والكـلامـا
و أنا تجرّعنـي مـن المـر بصحـون

والله يـا لـولا هالصـغـار اليتـامـا
و أخشى من السكّـه عليهـم يضيعـون

لا أقول كـل البيـض عقبـه حرامـا
و أصبر كما يصبر على الحبس مسجون

عليـه منـي كــل يــوم ٍ سـلامـا
عدّت حجيج البيـت واللـي يطوفـون

وصلـوا علـى سيّـد جميـع الأنامـا
على النبي ياللـي حضرتـوا تصلـون

موضوع: رد: من اشعار ابن عدوان 2008-05-23, 19:42

قصيدة جميلة جدا

أنا أحبها كثير صراحة

الله يعطيك العافية

((((((((((((((((((((((((((((((((شريف ))))))))))))))))))))))))))))))))))))))))

موضوع: رد: من اشعار ابن عدوان 2008-05-25, 19:57

الاخ شريف

مشكووووووووووووووووووووووور
على المرووووووووووووووووووووور
حياك الله مع تحياتى الحاره لك
سلالالالالالالالالالالالالالالالالالالام

موضوع: رد: من اشعار ابن عدوان 2008-05-25, 21:10

مشكور رأيس المنتدى على الأبيات الشعر الجميله